Chrysobothris rutilicuspis, nova species Buprestidarum

Ex affinitate Ch. insolatae Deyr. et perplexae Deyr. — ♀. Caput fronte impressa, circulatim striata, supra impressionem ignita, vertice viridi. Thorax viridis, lateribus late ignitus, transverse striolatus et sat dense interpunctatus, margine basali medio lobo apice truncato. Scutellum acute triangulare, coeruleum. Elytra sat dense punctata, subparallela, ultimo triente angustata, coeruleo-virescentia, utrinque macula ante medium, altera transversa in secundo triente pone marginem lateralem, sutura foveisque duabus basalibus pure virescentibus, ultimo triente, sutura excepta, ignito. Corpus infra viride, punctatum, episternis pro- et metathoracis et metasterno lateribus remote vermiculatis, abdomine lateribus nigro-coerulescenti, prosterno antice utriuque et coxis posticis auroreis, episternis pro- et mesothoracis aeneis. Pedes virides, femoribus posticis tibiisque intermediis et posticis obscurioribus, tibiis anticis apice ignitis. — Long. tot. 10 mm., lat. ad hum. 4 mm. Habitat in insula Celebes: Macassar (Dr. Platen).